Copy linkShare via TelegramShare via WhatsAppShare on FacebookShare on X (Twitter)Share on LinkedInShare via Email照片：pocstock我哋唔敢保證你喺交友 app 會搵到真愛，但係試試亦無妨丫！無論喺舒服嘅床上同重力被竇入面睇手機，又或者宅喺屋企煲劇都好，一人之境固然舒服，但係同人溝通都好重要㗎！其實交友 app 上面嘅人五花百門，有幽默嘅、靚女嘅、毒毒哋嘅…… 想知道香港有咩交友 app，既好玩又唔會中伏，不妨參考吓我哋以下嘅精選。遇上心儀對象之後記得喺花店買紮靚花，幫自己第一印象加分呀！
最受歡迎嘅香港交友 app1. Coffee Meets Bagel照片：Coffee Meets Bagel 官方 FacebookCoffee Meets Bagel 適合想搵知音嘅你。首先，系統會要求玩家輸入自己嘅喜好（例如平時做咩運動、鍾意聽咩歌等）同擇偶條件（例如唔食煙飲酒），然後你可以去 discover 頁面上面 like 人或者等人 like 你。如果咁啱兩個人都互相 like 咗對方，就可以喺 app 上傾七日計，而且呢七日內要決定交唔交換聯絡方式，繼續發展。
適合：搵志同道合嘅知音
2. Feeld照片：Feeld 官方 Facebook如果你覺得 Tinder 唔夠曳嘅話（大家明㗎啦），可以試一試 Feeld。Feeld 專門幫鍾意尋求刺激嘅情侶同單身人士，搵前所未有嘅性體驗，包括多人趴、角色扮演、3P 等。一定夠你玩成晚啦！
適合：想滿足特殊癖好嘅人
3. Hinge照片：Hinge 官方 Facebook雖然本地嘅 app store 冇辦法下載 Hinge，但係各位用 VPN 或者成日去出國嘅人有福喇，因為 Hinge 一直喺香港人氣高企！唔似得某 app 淨係可以靠左滑右滑揾靚仔靚女（唔開名啦），Hinge 希望幫你搵到真正合拍嘅伴侶，所以佢會透過 Facebook 將你同朋友嘅朋友拉埋一齊，再根據你同佢哋之間嘅共同點揀出合適嘅人選。你註冊嘅時候，要先填寫詳細嘅個人資料，畀 Hinge 了解你嘅嗜好。然後，每日中午，Hinge 就會畀一份篩選名單，列出一啲最適合你嘅人。呢種做法有助你搵到真正啱 feel 嘅人，因為大家已經有共同嘅基礎去建立關係。
適合：搵可以長期發展嘅深入關係
4. Her照片：Her 官方 FacebookHer 係專門研發俾非異性戀女士嘅應用程式，適合各位姊妹。當玩家 like 咗合眼緣嘅人之後，對方如果睇中你就可以搵你傾計。另外，Her 程式上面有好多關於 LGBTQ+ 嘅消息同新聞可以睇，好玩的嚟又有資訊性。
適合：鍾意女人嘅女人
5. OkCupid照片：OkCupid 官方 Facebook大家留意，你喺 OkCupid 上面答得越多問題，match 到嘅人就會越接近你嘅理想型，所以唔好偷懶呀！例如你可以指明你係希望搵人一夜情、拍拖或者結婚，OkCupid 都會詳細分析你嘅每個答案，幫你配對喜好同目的相似嘅人，非常適合想脫單嘅朋友。
適合：想認真搵啱對象嘅人
6. Happn照片：Happn 官方 Facebook驚錯過命中注定？唔使擔心。當你出街嘅時候，Happn 會幫你探測附近經過嘅其他 happn 用戶，然後自動顯示喺 timeline 上面。如果你對 timeline 上某個人有興趣嘅話，可以直接聯絡對方，冇興趣嘅就可以㩒交叉。
適合：鍾意喺街上面𥄫人嘅人
7. Bumble照片：Bumble 官方 Facebook好多男仔都會抱怨每次都要自己主動同女仔聯絡，但係 Bumble 嘅男玩家就唔同嘞。喺 Bumble，如果一男一女成功配對，只有女仔可以主動聯絡，男仔就只能夠耐心等待對方出擊。聽落係咪好新奇呢？所以用 Bumble 嘅姊妹們，記住要主動啲喇！
適合：鍾意主動出擊嘅女仔/肉食女、超級怕醜嘅男仔/草食男
時尚潮流推介全港20間高質髮型屋8. Grindr照片：Grindr 官方 FacebookGrindr 專為非異性戀男士設計，用家只需要上載幾張相，答啲簡單問題，然後揀選自己嘅理想型群組。用 Grindr 可以俾你更加容易認識住喺附近嘅夥伴，甚至有機會進行更深一層嘅交流…… 例如約出來見面囉。;)
適合：想收集「珍藏級」相片嘅男仔
9. Paktor照片：Paktor 官方 FacebookPaktor——「拍拖」——顧名思義，係一個幫你搵拖友嘅 app。當你註冊嘅時候，你需要首先填寫詳細嘅個人資料，回答關於你嘅工作、性格、興趣等等嘅問題。然後，Paktor 就會利用呢啲資料，運用演算法去幫你搵到同你真正夾嘅人。最特別嘅地方係：當你第一次同人 match 嘅時候，你係見唔到任何相㗎！你只會睇到一啲基本資料，例如性別、距離同職業。呢種做法令你可以專注於建立情感上嘅連結，而唔係以貌取人。而當你開始同你對象傾計嘅時候，你哋先可以交換相。好新鮮呢？
適合：將共同興趣放喺關係入面第一位嘅人
10. Tinder照片：Tinder 官方 Facebook講起交友 app，我哋梗係唔會漏咗最經典嘅 Tinder 啦～用法好簡單：睇上對方就向右滑，看唔上眼就向左滑。如果咁啱兩個人同時睇上對方，你會見到螢幕顯示「It’s a match」——第一次用 Tinder 可能會俾特殊效果嚇親！如果你真係對某個用家一見鍾情，可以㩒 superlike，對方就會知道你嘅誠意。Tinder出名係「速食世界」，所以你可能要準備「某方面」嘅發展會好快……
適合：鍾意速食、需要解決深夜慾望嘅人
11. Lunch Actually照片：Lunch Actually 官方 FacebookLunch Actually 由 Violet Lim 同佢嘅丈夫 Jamie Lee 創辦，2004年喺新加坡首先推出，之後擴展到馬來西亞、香港、印尼同泰國。佢哋嘅團隊致力為事業成功嘅人提供婚介服務，搵命中嘅真愛。
適合：希望喺感情生活上面安定落嚟嘅人
12. Lovestruck照片：Lovestruck 官方 Facebook只要講晒你所有嘅需求同願望，並交出一份個人資料，就可以搵到真愛？冇錯，喺 Lovestruck，就係咁簡單。成功預約之後，Lovestruck 就會幫你同潛在嘅對象互相匹配，而且你仲可以喺搵緊對象嘅時候諮詢意見。如果約會唔順利嘅話，你甚至可以即時 call agent「求救」添！
適合：搵長期伴侶嘅人
13. Goodnight照片：Goodnight 官方 Facebook夜晚瞓唔著？可以試吓玩 Goodnight。呢個 app 嘅設計特別在佢淨係畀用戶同對象講電話，而唔係 send 短訊。配對成功後，你可以打電話傾計，通過一次7分鐘嘅對話去感受對方嘅氛圍，喺未見到對方嘅相之前就已經進行對話。經過幾次電話約會之後，你先可以解鎖對方嘅個人檔案。如果你發現唔啱傾嘅話，你可以喺頭30秒內飛線，唔洗緊張！而且，Goodnight 嘅傾計時間係由晚上10點到凌晨4點，所以如果你喺凌晨瞓唔著，需要向人傾訴，呢個 app 就可以派上用場。另一個加分點係註冊 Goodnight 嘅時候唔需要提供大量個人資料，感覺私隱有多啲保障。。
適合：失眠人士同唔希望以貌取人嘅人士
14. Omi照片：Omi 官方 Facebook喺新加坡成立嘅 Omi 為想搵志同道合伴侶嘅你提供各式各樣嘅配搭方式。你可以用佢嘅 Dating Test、Omi Clic 或者 Telepath 功能嚟搵同你有相同興趣嘅人。預備好同你嘅對象傾計之後，你可以根據適合你嘅通訊方式同對方以短訊或者電話溝通。無論你係搵緊朋友定伴侶，Omi 都會幫到你！
適合：搵啱你氛圍嘅人
15. Heymandi照片：Heymandi 官方 Facebook唔鐘意自拍？ Heymandi 就啱晒你喇！呢個香港交友 app 打破以樣貌搵對象嘅方程式，畀你透過真實嘅對話同其他人建立關係。由你嘅嗜好、心情同興趣為出發點，同你嘅心儀對象展開對話。
適合：搵可以投入深入對話嘅另一半
[本文原於2020年12月出版，並於2024年由李綺婷更新。]